Speulveld Pestoer Veheggestraot wórdt opgedoekt.
Alles bej Casele Vuruut stöt ien ut taeken van de kommende boerebrulleft.
Urstdaags keumt dur en advertensie ien de krant worien de speultoestelle van
ut speulveld an de Pestoer Verheggestraot te koeëp werre angebooje. Gelukkig
hebbe en paar wakkere buurtbewoners ut liegbaenkske nog net buute de
verkoeëp wieëte te halde. Ut schilde nie veul of ok dat was verlore gegaon.
Now zal ut en prominente plats kriege ien den hof van Geert Vekuuk. Ut velt
os trowwes op dat niemus zich afvraogt worrum dat juust daor teraecht mot
komme. Laote wej dur dorrum dan ok mar niks ower schrieve.
Ze zegge dat ut veld wördt umgeploegd en iengezaeit zal werre mit ut
superzaod wor vur twieë waek terug nog ower gesproke wier ien de Schans.
Binne de korste kiere zulle dur en groeët antal Oelderse megjes rondloeëpe,
zoeë bewaert men. Ut superzaod produciert zoveul gras dat ut de
melkproduktie van 50 koewe mekkelik bej kan halde. Al gow zulle ien de
Pestoer Verheggestraot de urtse taöte an de weg staon. Dat duut wer daenke
an vroeger: toen koste an ut antal taöte dat an de stroat stond zien of dur
ennen dikke of enne schraole boer wonde. Tiggeworrig lit dat wat anders. As
ge now de taöt buute de deur zet, daenkt de buurt mettieën dat ge
huweliksprobleme het.
Dor wille ze bej Casele Vuruut nog niks van wieëte, want dor make ze zich op
vur ut komende groeëte fïeëst: Ut Verlovingsbal. Nog mar krap 14 daag en
dan is ut al zowiet. Um precies te zien op zondag 19 november ien de
Schanseschop. Benejt wat dur allemol göt gebeure? Kom dan drek um 3 uur
dan wette zeker dat ge niks hoeft te misse.
De kiender die en briefke hebbe gekrege um mit te kunne doen an de
kienderboerebrulleft motte nie vergaete dat ien te levere. Dat kunde doen bej
Marly Steeghs an de Matthiasstraot. Ut kost niks en ge kunt dur veul schik
mit kriege. Dus gow nog efkes doen.
Ut promosieteam Boerebrulleft
UI VUR-UUT
