Carnaval '95 is wer vurbeej en den vastentied is alwer angebroke.
We hebbe bieëstig veul geluk gehad mit ut waer onder de
optochte. Zoeë kos os moj boerestoet op dinsdag vanuut ut
Owerbroek via ut Lunse Veld nor Luëne trekke. Moj is dat wor,
allemol die perdjes zo moj opgetuugd vur die reejtuuge mit dorien
die moj uutgedoste meense.
Keurig op tied kwame ze an beej de Steeg. Vandaoruut geenge ze
vurafgegaon dur de drumband en gevolgd dur ut vroluk
zwierende en zwaaiende voetvollik op weg naor den Brink. Daor
kos de sirremonie dan ok op tied beginne.
Naodat de vader van de Bruud, Wim urst slaai haay liere sneeje
en de vader van den Bruudegom anzienluk mier moeite haaj um
Netty en drueëg koe te laote melke gave de elders van werskante
toestemming vur de onechtverbientenis. Vurdat ut geeng gebeure
kwaam urst nog ut kompleet gezelschap van ut vörrig jaor naor
böve. "Warschienluk um urst Wim en Netty te waarschuwe vur de
mogeluke gevolge van zon verbientenis, liete Jan en Jet de uut
hunne onecht vortgekomme onechte spruut (Knollie genoemd) an
Wim en Netty en alle andere anwezige zien. Hierbeej wier ut
hieële gezelschap en en groeët gedieëlte van de zaal (vur zover de
vurraod strekte) getraktierd op beschuut mit muuskes.
Hierdör allieën mar angemoedigd was toen ut onecht huweluk
dan ok zoeë voltrokke. Nao ut schudde van veul hendjes kos ut
gezelschap eindeluk platsneme an de boeremoestoffel. Van ut
lekkere boeremoes mit worst wier flink gegète. De dames van den
vrouwenboond mosse zelfs de pöt tot op den boijem uutscharre
um de léste porsie beejèn te kriege. Nao de nuuëdige vurdrachte
wier de middag worran Noeëi Tuus wer eur vurtreffeluke
muzikale mitwerking haaj verlend afgeslote.
S' aoves wier der beej Pietje Martes nog efkes duchtig mit de
jeugd gehost en gespronge dur ut gezelschap. Toen ut vur de
jeugd vort vurbeej was, miek ut gezelschap zich op vur ut
boeremoesbal ien ut knollehuus.
Daor wier onder muzikale begeleiding van Puppies Huusorkest,
worbeej Prins Jan V ok soms zien slagwerik kwaliteiten kos
botviere, en de Joekskapel nog mennige mèter afgeleed ien de
verschillende polonaises.
